<p style="text-align: center;"><strong>Ө.Цэрэнчунт /2003 оны төгсөгч/</strong></p> <p style="text-align: center;">Монгол Улсын Дуурь бүжгийн эрдмийн театрын гоцлол дуучин Монгол Улсын консерваторийн багш, ОХУ-ын Буриад Улсын Дуурь бүжгийн академик театрын гоцлол дуучин Өлзийбүрэн овогтой Цэрэнчунт</p> Миний бие 2002 онд 8-р ангиа төгсөөд Дундговь аймгаас Улаанбаатар хотноо ирж, Их Засаг их сургуулийн дэргэдэх Лицей сургуулийг хайсаар очиж байлаа. Их Засаг лицей сургуулийг сонгосон шалтгаан нь урлаг соёлыг дэмждэг, сайн сургууль гэдэг яриа сонссон юм. Урд нь удаан хугацаагаар хотод байж үзээгүй надад хотын соёл, орчин, сургууль, сурагчид гээд бүх л зүйл шинэ, сонин, өөр орчин байлаа. Сургуульд орж ирээд хамгийн анх хичээлийн эрхлэгч Амаржаргал, Цэцэгмаа захирал нартай уулзаж байсан юм. Тэр үед хоёр багшийгаа хараад хотын хүн гэж ийм л сайхан, эелдэг, соёлтой хүмүүс байдаг юм байна гэж бодож одоо хүртэл тэд нараар хотын хүнийг төсөөлж байдаг билээ. Сургуульд ороод байж байтал төд удалгүй сургуулийн танилцах үдэшлэг болсон юм. Танилцах үдэшлэг тараад хот сайн мэдэхгүй би хорооллоос төөрч, будилсаар сүүлд нь мянган оюутны байранд алхаж ирж байсан хөгжилтэй дурсамж санагдаж байна. Багаасаа дуу хуурт дуртай, дуулж байсан би сургуулийнхаа тэр танилцах үдэшлэг дээр дуулсан юм. Танилцах үдэшлэгийн дараа сургууль дээрээ явж байтал хэдэн охид “Чи шүү” гэж хэлэхэд нь хөдөөнөөс ирээд удаагүй байсан болохоор сайн ойлгохгүй, гэртээ очитол юу гэсэн үг юм бол доо гэж бодож байлаа. 9-р ангийн сурагчид анги дэвшин суралцаж болдог гэдгийг сонсоод хичээлүүдээ шахан, шамдан үзсээр ангийн хүүхдүүд болон багш нарынхаа ачаар 11-р сард 10-р ангид элсэн суралцсан юм. Ингэж хичээсний үр дүнд 10-р ангиа “Онц” дүнтэй төгссөж байлаа. Тэр үед гурван хүүхэд онц төгссөн юм. Нэг нь одоогийн УИХ-ийн гишүүн Н.Учрал, бас Цэлмэг бид гурав онц дүнтэй 10-р ангиа дүүргэж, ажил амьдралын далайд хөл тавьж байлаа. Хэрвээ би Их засаг лицей сургуульд сураагүй байсан бол энэ хүртэл явах байсан болов уу гэж хааяа бодогддог юм. Эрдэм мэдлэгтэй, хүний төлөөх сэтгэл төгс, хайрт багш нарынхаа ачаар өдий зэрэгтэй явж олон улсын театруудын тайзнаа дуулж хүсэл мөрөөдлөө биелүүлж явна. Сургуулийнхаа нийт багш нар болон үе үеийн төгсөгчдөдөө мөн энэ ачит сургуулийг үүсгэн байгуулсан захирлууд Н.Ням-Осор Ж.Цэцэгмаа нартаа 20 жилийн ойн баярын мэнд хүргэж, эрүүл энх, саруул сайхан бүхнийг ерөөе.